შენ ჯერ ზრდილობა ისწავლე და პარლამენტში მერე მოდი, - ასე მიმართა „ხალხის ძალის“ წევრმა, დიმიტრი ხუნდაძემ კომიტეტების გაერთიანებულ სხდომაზე „ნაციონალური მოძრაობის“ წევრს, ანა წითლიძეს.

ამის საპასუხოდ, ანი წითლიძემ მას „ნაძირალა“ უწოდა.

სიტყვიერი დაპირისპირებისას დიმიტრი ხუნდაძემ ანი წითლიძეს მიმართა:

„თავხედი ხარ, ჯერ ზრდილობა უნდა ისწავლო და მერე მოხვიდე აქ. სარკეში მაინც ჩაიხედე, შენ გაუზრდელო შენ. ვისაც გავხართ, იქ ზის“.

დიმიტრი ხუნდაძის განცხადებით, ოპოზიციას ე.წ. აგენტების შესახებ კანონპროექტთან დაკავშირებით ერთი არგუმენტიც კი არ წარმოუდგენია, თუ რატომ არის მათთვის მიუღებელი.

„შემოდით სამსჯელოდ, არ შეგიძლიათ მსჯელობა. ერთი არგუმენტი არ გაქვთ. შენი ქვეყანა შენის საპატრონო უნდა იყოს პირველ რიგში და არა პუტინის შეკვეთებზე ირბინო. შენი თავი შენადვე უნდა გეკუთვნოდესო და არა კუბილიუსს.გეყოფათ ახლა მართლა. ხმა არ ამომიღია და გისმენ, რუსულის მეტი არაფერი გითქვამს. არგუმენტი დადე, არც კი წაგიკითხავს. კანონზე მელაპარაკე. სხვას ემსახურებით და არა თქვენს ქვეყანას. ამ კანონის მიზანია, ხალხმა იცოდეს ფული რაში იხარჯება, მეტი არაფერი. აქ რატომ ხართ, სპეკულაციის მეტი არაფერი გაქვთ. ერთი კითხვა არ დაგისვამთ“, - მიმართა დიმიტრი ხუნდაძემ ანი წითლიძეს და ოპოზიციის სხვა წარმომადგენლებს.