შემოაპარებენ ხელისუფლებასთან დაკავშირებულ რუსულ კომპანიებს , - ასე ეხმიანება "ნაციონალური მოძრაობის" დეპუტატი რომან გოცირიძე ჟურნალისტებთან პრემიერ-მინისტრის განცხადებას ანაკლიის პორტთან დაკავშირებით.

მისივე თქმით, ქვეყანამ საინვესტიციო მიმზიდველობა დაკარგა.

"ანაკლიის პროექტის გაჩერება იყო შეგნებული, რაც გააკეთა ივანიშვილმა რუსეთთან შეთანხმებით და რუსეთის დავალებით. ამ პროექტის განხორციელებას ბევრი წელი დასჭირდება. განცხადება იმის თაობაზე, რომ ყველაფერს გააკეთებს სახელმწიფო, არის მავნებლური.

ასევე მოხდა „ნამახვანჰესის“ გაჩერება, ბნელი ძალების და საქართველოს მთავრობის ხელშეწყობით და ახლა განაცხადა ღარიბაშვილმა, რომ სახელმწიფო ჩადებს ენერგეტიკაში 2.5 მილიარდს, ანაკლიის პროექტში კი თითქმის ერთ მილიარდამდე, რაც იმას ნიშნავს, რომ ვალი უნდა აიღოს სახელმწიფომ, გაიფლანგოს ეს ფული კორუფციულად, მოხმარდეს "ქართულ ოცნებასთან" დაკავშირებულ ბიზნესებს, შემოაპარებენ ხელისუფლებასთან დაკავშირებულ და რუსულ კომპანიებს. ქვეყანამ დაკარგა საინვესტიციო მიმზიდველობა. ქვეყანაში მთავარი უნდა ყოფილიყო უცხოური ინვესტიციების მოზიდვა, ახლა კი ჩვენი მოქალაქეების ჯიბიდან ან ნასესხები ფულით აპირებენ იმ პროექტების განხორციელებას, რომელსაც სიამოვნებით განახორციელებდა კერძო ინვესტორი, პასუხი უნდა აგონ თუნდაც იმის გამო, რომ ამდენი დრო დაგვაკარგინეს", - განაცხადა გოცირიძემ.