საქართველოში უცხოური ანაბარი არა თუ შემოსავლის წყარო არ არის, არამედ თავის ღირებულებასაც ვერ ინარჩუნებს. იგი თვალსა და ხელს შუა დნება. დაახლოებით ისეა, საყინულედან ქათამს რომ გამოიღებ, მაცივარში შეინახავ და დილით გალღობილი რომ დაგხვდება. – წერს “ნაციონალური მოძრაობის” დეპუტატი რომან გოცირიძე სოციალურ ქსელში.


“ჩვენი ქვეყანა რომ დოლარიზებულია ყველამ კარგად ვიცით. ანაბრების უდიდესი ნაწილი დოლარშია და უცხოეთიდან გადმორიცხვებით სულდგმულობს ხალხი. ახლა ყველა დიდ ზარალს განიცდის-ლარიანები ფასების ზრდის გამო, დოლარიანები კი სამმაგად. რას კარგავენ უცხოური ვალუტის მფლობელები?
-დანაკარგი პირველი:
საქართველოში უცხოური ანაბარი არა თუ შემოსავლის წყარო არ არის, არამედ თავის ღირებულებასაც ვერ ინარჩუნებს. იგი თვალსა და ხელს შუა დნება. დაახლოებით ისეა, საყინულედან ქათამს რომ გამოიღებ, მაცივარში შეინახავ და დილით გალღობილი რომ დაგხვდება.
ბანკებში წლიური სარგებელი ერთ პროცენტზე ნაკლებია. ამაში მთავრობა და ეროვნული ბანკიცაა დამნაშავე, არავის უნდა შენი სავალუტო დანაზოგი ძვირად, რადგან მიაყარეს კომერციულ ბანკებს მუქთა ფული( საპენსიო ფონდის სახსრები, რეფინანსირების სესხები, ბიუჯეტის ნაშთებში დაგროვილი რესურსები). ეს ინფლაციას იწვევს. დოლარში დანაზოგი რეალურად გაუფასურდა, რადგან შემოსავალი ერთ პროცენტამდეა, დანაკარგები კი დაახლოებით 8 პროცენტია, რადგან ამერიკაში თითქმის 9 პროცენტიანი ინფლაციაა, ანუ შენი დოლარებით ემიტენტ ქვეყანაში ნაკლებ საქონელს იყიდი.
-დანაკარგი მეორე-მესამე ერთად:
ლარი მყარდება დოლარის მიმართ. დოლარის პატრონი ადამიანები დიდძალ ფულს კარგავენ ლარში გადაცვლისას. ერთია, გრჩება ნაკლები ლარი და მეორეა, ლარში ფასები იზრდება ორნიშნა როცხვით. შენი დოლარი, ლარში გადაყვანილი, მნიშვნელოვნად ნაკლებ საქონელს ყოდულობს, ვიდრე ფასების ზრდამდე შეეძლო.
რომ შევაჯამოთ: აქეთ გაცვლის კურსი გატყავებს და იქით ინფლაცია.
რა დასკვნა უნდა გამოვიტანოთ აქედან? ის, რომ კარგი იქნება, თუ ლარი გაუფასურდება? არა, ეს იქნება ცუდი, რადგან ფასები კიდევ უფრო გაიზრდება.
როდესაც ამ დონეზე გამყარებული ლარი ფასების ზრდას ვერ აჩერებს, ეს მრავალი პრობლემის მაჩვენებელია. მთავარი მიზეზი არა ე.წ. საგარეო ფაქტორია( რომელიც, ასევე მოქმედებს, რა თქმა უნდა), არამედ ხელისუფლების არასწორი მონეტარული და ფისკალური პოლიტიკა, რომელიც არის ფასების და გაცვლითი კურსის არასტაბილურობის მთავარი წყარო.” – წერს რომან გოცირიძე.