თუ არსებობს იმის ინდიკაცია, რომ ხელისუფლება რაღაცას აპირებს, ეს უკვე უნდა ჩანდეს, ან განცხადებით, ან რაღაც ნაბიჯებით. მას შემდეგ რაც ევროპარლამენტმა გადაწყვეტილება მიიღო და 12 პუნქტიანი რეკომენდაცია მოგვცა, გვესმის მხოლოდ აგრესია, მხოლოდ მუქარა ელჩებზე, დასავლეთზე, აღარაფერს ვამბობ ოპოზიციაზე, - ამის შესახებ „ევროპული საქართველოს“ ერთ-ერთმა ლიდერმა გიგი წერეთელმა „პალიტრანისუსის“ გადაცემაში „360 გრადუსი“ განაცხადა.

როგორც წერეთელმა აღნიშნა, ხელისუფლება ახლა ცდილობს როგორმე გაწელოს ეს პროცესი.

„მე პირადად არაფრის მოლოდინი არ მაქვს ერთი რამის გარდა, რომ ხელისუფლება ახლა ტაქტიკურად ცდილობს როგორმე გაწელოს ეს პროცესი. ანტიდასავლური კამპანია და რუსეთთან ასე გაჩუმება და ის მესიჯები, რაც საქართველოდან წავიდა და რამაც ევროკომისიას ათქმევინა, რომ არა, არა, 6 თვეში გადაწყვეტილება არ იქნება, ეს ნიშნავს, რომ ვერანაირი სურვილი და ენთუზიაზმი ვერ იგრძნეს ხელისუფლებისგან. ხელისუფლების პირველივე რეაქცია რა უნდა ყოფილიყო? - უნდა ეთქვათ, რომ ჩვენ გვინდა ეს, ჩვენ გავაკეთებთ ყველაფერს 6 თვეში. მაშინ გამართლებული იქნებოდა ოპოზიციის ყოფნა პარლამენტში და თანამშრომლობა ხელისუფლებასთან. ოპოზიციის როლი პარლამენტში მაშინაა, როცა მას შეუძლია პროცესზე გავლენა მოახდინოს. ჩვენ შედეგი გვჭირდება. თუ ეს შესაძლებლობების ფანჯარა არ გამოვიყენეთ, შესაძლოა ამ ყველაფერმა ათწლეულები გადაიწიოს. ჩემი აზრით ხელისუფლება ამ პროცესს წელავს იქამდე, რომ მართლა დაეკარგოს აზრი ვადამდელ არჩევნებს. ოპოზიციაც უნდა ჩამოყალიბდეს უნდა თუ არა ხელისუფლების შეცვლა. როგორ? - ეს არის ყველაზე რთული და მძიმე ამოცანა ოპოზიციისთვის. ამიტომაც ამ საქმეს მეტი კოორდინაცია სჭირდება. მე არ მინდა ოპოზიცია ვაკრიტიკო, მაგრამ „ნაციონალური მოძრაობა“ ამბობს, რომ შესაძლებელია ვითანამშრომლო ხელისუფლებასთან, „ლელო“ და „სტრატეგია აღმაშენებელი“ ცალკე ალტერნატიული კანონპროექტების მომზადებას აპირებს. ძალიან გამიხარდება, თუ „ნაციონალური მოძრაობის“ ეს განცხადება რაღაც რეალურ ამოცანებს ეფუძნება“, - განაცხადა წერეთელმა.

წერეთელმა ასევე ისაუბრა ნიკა გვარამიას და მიხეილ სააკაშვილის საქმეებზეც და აღნიშნა, რომ ორივე ეს საქმე შემაფერხებელი იქნება ევროინტეგრაციის პროცესში.

„ნიკა გვარამიას საკითხი მწვავე საკითხია, კიდევ უფრო გამწვავდება და დიდად ხელის შემშლელია ჩვენი ევროინტეგრაციის და პოლიტიკური პროცესის ნორმალიზაციის, ასევე სააკაშვილის თემაც. სალომე ზურაბიშვილს სრულიად არ ვეთანხმები იმ განცხადებაში, როდესაც თქვა, რომ სამი ადამიანი უკვე შეიწყალა და ამოწურა თავისი უფლება. ხელისუფლების კრიტიკა არის სწორედ ის მექანიზმი, რომლითაც გვინდა გამოვასწოროთ ვითარება და დეპოლარიზაცია მოხდეს, დავსხდეთ ერთად მაგიდასთან. როდესაც ჩვენ ვეუბნებით, რომ ნიკა გვარამია არ უნდა დაიჭირო პოლიტიკური მოსაზრებით, ნიკა გვარამია კი არა, გოგაშვილიც არ უნდა დაიჭირო პოლიტიკური მოსაზრებით, რისთვისაც არის პასუხსაგები, იმისთვის უნდა აგებინო, მაგრამ ახლა ასე, რაღაცისთვის რომ გაბრაზდი, ის გამოიფინა, რაც არ გინდოდა და მაგის გამო მიადექი და სპეცოპერაცია ჩაატარე, ეს არ არის სწორი.

სალომე ზურაბიშვილის ლიმიტები ამოწურული არ არის. ყოველთვის შევეწინააღმდეგები იმაზე - „არა და არასდროს“ - ეს არ არის პოლიტიკური განცხადება, ეს არის არაპოლიტიკური განცხადება და არ არის პრინციპების დაცვა. პოლიტიკოსს მოუწევს იმგვარი კომპრომისის გაკეთება, რასაც შეიძლება შინაგანად არ ეთანხმებოდეს, მაგრამ სჭირდება ქვეყანას და საზოგადოებას. როდესაც მედიაციაზე საუბრობ, მაგრამ მთავარ ოპოზიციურ ძალას, რომლის ლიდერი ციხეშია და ასევე მეორე მნიშვნელოვანი ფიგურაც ციხეშია, შეგიძლია გადაწყვეტილება მიიღო, არ იღებ და თან კომპრომისისკენ მოუწოდებ, ძალიან ძნელია რომ ის ძალა დაგიჯდეს მოლაპარაკებაზე?! და შენი მედიაცია დარჩება სურვილად“, - განაცხადა წერეთელმა.