ცნობილი ასტროლოგი, სოფია ბზეკალავა მომავალ 2022 წლის მთავარი ტენდენციების შესახებ გვესაუბრება.

სოფია ბზეკალავა:

2022 წელი ვენერიანული წელია და ის არის ფულისა და სიყვარულის წელიწადი. მთავარი აქცენტი იქნება პირადი ურთიერთობებისა და ფინანსების თემები. რაც შეეხება სიყვარულს – ვენერა თხის რქაში გადადის, გარკვეული წყვილები დაიშლება, გარკვეული წყვილები კი დიდი ხნის განმავლობაში შეძლებს მყარი ურთიერთობების შენებას. ახლა უკვე დაწყებულია ეს პერიოდი, მაგრამ 2022 წელს უფრო გაძლიერდება.

2022 არის შეფასებების წელი – რაც ორი წლის განმავლობაში დავაგროვეთ, ცოდნა, გამოცდილება თუ იდეოლოგია, კარგი კუთხით, ამ ყველაფრის მონეტიზაცია 2022-23 წლებში მოხდება, ცუდი კუთხით კი – პირიქით, შეიძლება, სტრესული გამოცდილებაც იყოს, მაგრამ ეს ძალიან ინდივიდუალურია.

პროფესიებისადმი მოთხოვნები შეიცვლება – ახალი პროფესიების ერა დგება. ბოლო პერიოდში იყო ტრენდული მოკლევადიანი კურსები ქოუჩინგი, ტრენინგები, რადგან ტყუპი იყო აღმავალი კვანძი. ეს კი იცვლება იანვრიდან და კუროს ნიშანი ამოდის ზემოთ, ამიტომ ქალების ენერგია, მათი კონსოლიდაცია არის ძალიან მნიშვნელოვანი. მამაკაცებს უახლოესი ორი წლის განმავლობაში, ძირითადად, ფსიქოლოგიურად, ძალიან უჭირთ. კაცობრიობის ძლიერ ნაწილს უჭირს, ამიტომ ქალების მხარდაჭერა, ქალური ენერგია წინ უნდა წამოვიდეს.

ძალიან დიდი მოთხოვნა გაჩნდება სახელოვნებო სფეროზე, გართობაზე, მუსიკაზე. იმაზე, რაც ბოლო ორი წლის განმავლობაში, ფაქტობრივად, აღარ იყო. ვერსად წახვალ, მუსიკას ვერ მოუსმენ, გასართობი გადაცემებიც თითქოს აღარ არის. ამისი შიმშილი გაჩნდება და ნელ-ნელა ეს სფერო წინ წამოიწევს.

2022 წლის განმავლობაში რაღაც ქვეყნებში საზღვრები გაიხსნება, მაგრამ ვერ ვიტყვი, რომ პირბადეს მოვიხსნით. სიფრთხილე, რაც ამ ორა წელმა მოგვცა, კიდევ უნდა გამოვიყენოთ.

ახლა მოდის ვეფხვის წელიწადი, ზოგი ლურჯს ეძახის, ზოგი – შავს. მუქ ლურჯში გარდამავალი შავია. ვეფხის პრინტთან ერთად, ეს ფერები იქნება ძალიან მოდური შემდეგ წელს. ვეფხვი საერთოდ არის ძალიან ჭკვიანი და ფრთხილი. ხარი პირდაპირ რქებით აწვება, ვირთხა ხომ სულ იმალება და რაღაცებს ხლართავს, ვეფხვი კი ჭკვიანია. დაფასდება ყველა ის ადამიანი, ვისაც შეუძლია, თანმიმდევრულად დაგეგმოს სტრატეგიულად საქმე და შემდეგ წარუდგინოს საზოგადოებას, ვისაც აყალ-მაყალისკენ არ აქვს მიდრეკილება, გააჩნია გამჭრიახობა, მეტ-ნაკლები დიპლომატიურობა. ვეფხვი არ არის ტიპი, ვინც ვინმეს დაემორჩილება. იტოვებს თავისუფლებას, ამიტომაცაა ეს წელიწადი ხელოვანებისთვის, რადგან ისინი თავისუფალი ხალხია.
2022 წელი უფრო უკეთესი უნდა იყოს, ვიდრე წლევანდელი, მაგრამ ასტროლოგები ველოდებით პლანეტების აღლუმს, აპრილიდან ივლისის დასაწყისამდე. იგივე იყო 2020 წელს, მაგრამ მაშინ აღლუმი იყო თხის რქაში, ახლა მერწყულსა და თევზებში იქნება, ამიტომ ასტროლოგები დიდ ქვეყნებში წყალდიდობებსა და მაგნიტურ ქარიშხლებს ელოდებიან. შეიძლება, ელექტროტექნიკა გამოვიდეს წყობიდან. სანამ კორონა იქნებოდა, პროგნოზირება ძალიან რთული იყო. ეპიდემიას არ ელოდნენ, უფრო მეტად – სატახტო თამაშებს… ახლა პოლიტიკური კუთხით პერიოდულად იქნება ამოფრქვევები.

2022 წელი ჩვენთვის გარდამტეხი იქნება – საქართველო ან განვითარდება და მიიღებს ისეთ გადაწყვეტილებებს, რითაც მთელი მსოფლიოს პატივისცემას მოვიპოვებთ მეტ-ნაკლებად, ან გავიმეორებთ 1991-93 წლებს, რაც ჩვენი ქვეყნისთვის არცთუ სასიამოვნო პერიოდი იყო. ჩემი აზრით, ახლა შედარებით კარგი ტენდენციები განვითარდა და მე, მაგალითად, უკეთესობას ველოდები.

2022 წელი ბევრი ადამიანისთვის სტრესული წელი იქნება, განსაკუთრებით აპრილის მერე, რადგან ემოციური იქნება. ქალების ბიზნესი კარგად განვითარდება, მაგრამ მეორე მხრივ, ყველაზე მეტად ისინი იჩხუბებენ ერთმანეთთან. მთავარი თემა ხომ ფული და სიყვარულია, თუკი ამ სფეროებში მერკანტილური დამოკიდებულება გამოიკვეთება და სამკუთხედები, აქ ჩხუბს ვერ ავცდებით. ამ წელიწადს დაიბადებიან ისეთი ბავშვები, რომლებიც წესით, არ უნდა დაბადებულიყვნენ. წლის მეორე ნახევარი ძალიან ემოციური იქნება პირადი და ფინანსური კუთხითაც. ძალიან შეიცვლება საფინანსო სექტორი.

fortuna.ge