უკრაინული და ყაზახური სპორტული გამოცემების ინფორმაციით, საქართველოს ნაკრების მთავარი მწვრთნელი ვლადიმირ ვაისი შესაძლოა, ყაზახური „ასტანას“ მთავარი მწვრთნელი გახდეს.

სპორტული საიტი „KazFootball.kz“ - ის განმარტებით, „ასტანას“ ამჟამინდელი მწვრთნელი უკრაინელი რომან გრიგორჩუკი თანამდებობას სანაკრებო პაუზის დროს დატოვებს, ყაზახური კლუბის ხელმძვანელობა კი უკვე ეძებს მის შემცვლელს და მოლაპარაკებას ვლადიმირ ვაისთან აწარმოებს.

ამასთან, წყაროს ინფორმაციით, ვაისმა შესაძლოა, საქართველოს ნაკრების პოსტი სანაკრებო პაუზის შემდეგ - ან ზამთარში დატოვოს და სამუშაოდ ყაზახეთში გადაბარგდეს.

უკრაინული საიტების ინფორმაციით, გრიგორჩუკი უკვე უკრაინაში იმყოფება. ის "ასტანაში" 2018 წლის ივნისში დაინიშნა და ეროვნული ჩემპიონატი და ქვეყნის სუპერთასი მოიგო. რაც შეეხება ვაისს, ის უკვე მუშაობდა ყაზახეთში, კერძოდ კი, 2012-2015 წლებში "კაირათის" მთავარი მწვრთნელი იყო. ვაისი 2016 წლიდან საქართველოს ნაკრების მთავარი მწვრთნელია და კონტრაქტის ვადა საქართველოს ფეხბურთის ფედერაციასთან 2019 წლის ბოლომდე აქვს.

შეგახსენებთ, რომ საქართველოს ნაკრები დღეს, 17:30 საათზე სტამბოლში სამხრეთ კორეასთან ამხანაგურ მატჩს გამართავს.

აღნიშნულ ინფორმაციას საიტი „SportAll.Ge“ ავრცელებს.