უზენაესი სასამართლოს ყოფილი თავმჯდომარის, თსუ-ს პრორექტორის, ნინო გვენეტაძის განცხადებით, მან რეაბილიტაცია დაასრულა და ახლა ჯანმრთელობის მდგომარეობა ხელს უწყობს, რომ თსუ-ში, აკადიური და საგანმანათლებლო საქმიანობა გააგრძელოს.

"მე როდესაც გავაკეთე წერილობით განცხადება, მიზეზი ნათლად მივუთითე და ახლაც, პირველივე სიტყვაში ვახსენე ჯანმრთელობის მდგომარეობის გაუარესება. მოგეხსენებათ, რომ უზენაესი სასამართლოს თავმჯდომარის პოზიციის განხორციელება ძალიან დიდ ძალისხმევას ითხოვდა, რამაც რეალური ასახვა ჰპოვა ჩემს ჯანმრთელობაზე. ამდენად, მე დამჭირდა დრო სარეაბილიტაციოდ. განცხადება, რომელიც წერილობით გავაკეთე, დეტალურად შეიცავდა ამ ინფორმაციას. მე არ ვიცი, რატომ არ არის ეს განცხადება სარწმუნო. დღეს მაქვს უნარიც და ჯანმრთელობის მდგომარეობაც მიწყობს ხელს, რომ აკადიური და საგანმანათლებლო საქმიანობა გავაგრძელო", - განაცხადა გვენეტაძემ.

კითხვაზე, იყო თუ არა მასზე ზეწოლა, როგორც წასვლასთან დაკავშირებით, ისე იმ რამდენიმე წლის განმავლობაში, ვიდრე უზენაესი სასამართლოს თავმჯდომარედ მუშაობდა, გვენეტაძემ განაცხადა:

"არავითარი ზეწოლა ჩემზე არ განხორციელებულა. მე მყარი საკონსტიტუციო ვადით ვიყავი გამწესებული უზენაეს სასამართლოში",- აღნიშნა მან.

მისივე თქმით, გამჭვირვალე მართლმსაჯულების უზრუნველყოფისთვის, უზენაეს სასამრთლოში კონფლიქტური სიტუაციები ბევრჯერ იყო, თუმცა ეს ზეწოლა არ ყოფილა.

"მე მოვისმინე ჩემი ყოფილი თანაგუნდელის მოსაზრებები ზეწოლასთან დაკავშირებით. აზრთა სხვადასხვაობა ხშირად იწვევდა კონფლიქტურ სიტუაციებს და ჩემმა თანაგუნდელმა სწრაფად დატოვა ის პოზიცია და საქმიანობა, რომელსაც ერთად ვახორციელებდით და ამის შემდეგ სასამართლო ხელისუფლებლება, მართლმსაჯულების ეტაპები წარმოშობდა კონფლიქტებსაც, შეუთანხმებლობასაც, მაგრამ ეს პროცესი იყო სამუშაო, რომლის მთავარი მიზანი იყო დამოუკიდებელი და გამჭვირვალე მართლმსაჯულების უზრუნველყოფა. ამდენად მას თავისი შეხედულება და ეთიკური სტანდარტი აქვს. რაც შეეხება ფსიქოლოგიურ ზეწოლას, მახსოვს ასეთი განცხადება რომ გავაკეთე, ეს იყო ერთ-ერთი ეტაპი, როდესაც გარკვეული რაოდენობა მოსამართლეების უვადოდ გამწესება ხდებოდა და ამ პროცესთან მიმართებით, ჩვენ გვქონდა ძალიან წინააღმდეგობრივი და დაძაბული პოზიცია", - განაცხადა გვენეტაძემ.