როგორ ფიქრობთ, ამ თეთრ ქაღალდზე, რომელსაც დღეს ლონდონში ექსპერტიზა უტარდება, შემთხვევით, თქვენი პორტრეტი ხომ არ გამოისახება?! - ასე მიმართა ფრაქცია "ნაციონალური მოძრაობის" თავმჯდომარე რომან გოცირიძემ შინაგან საქმეთა მინისტრ გიორგი გახარიას, როდესაც "თიბისი ბანკის" გარშემო განვითარებულ მოვლენებზე ისაუბრა.

რომან გოცირიძის განმარტებით, მინისტრ გახარიას შეკითხვა დაუსვა იმ წერილზე, რომელიც გოცირიძის თქმით, გახარიამ "თიბისი ბანკის" ხელმძღვანელს მისწერა, თუმცა მინისტრისგან პასუხი ვერ მიიღო.

"ბატონო გიორგი, 5 შეკითხვიდან არც ერთს უპასუხეთ, ვინაიდან თქვით, რომ ეს არ შედის თქვენი კომპეტენციის სფეროში, მაგრამ ერთი პირდაპირ არათუ თქვენს სფეროში შედიოდა, თქვენ გეხებოდათ. მე დაგისვით შეკითხვა იმ წერილთან დაკავშირებით, რომელიც თქვენ "თიბისი ბანკის" ხელმძღვანელს მისწერეთ. მან ახლახანს განაცხადა, რომ ლონდონში მთავრდება ექსპერტიზა და პასუხი ამ დღეებში ჩამოვა. ბავშვობაში დეტექტივებს ხომ კითხულობდით?! გახსოვთ, როგორ არის დეტექტივებში, მოკლულის თვალებში რომ მკვდრის ხატი თუ სახე აისახება, როგორც ფოტოგრაფიაში. როგორ ფიქრობთ, ამ თეთრ ქაღალდზე რომელსაც დღეს ლონდონში ექსპერტიზა უტარდება, შემთხვევით, თქვენი პორტრეტი ხომ არ გამოისახება?! "- განაცხადა გოცირიძემ.