ხელისუფლებას სულ ტყუილად ჰგონია, რომ უბნებზე მათი მიყვანილი ადამიანები ხმას "ქართული ოცნების" კანდიდატს აძლევენ, - ამის შესახებ "ევროპული საქართველოს" საპრეზიდენტო კანდიდატმა დავით ბაქრაძემ განაცხადა.
როგორც ბაქრაძემ პრესკონფერენციაზე განაცხადა, ხელისუფლება ადმინისტრაციული რესურსის გამოყენებას ცდილობს.
"ჩვენი მონაცემებით ძალიან კარგად მიდის კენჭისყრის პროცესი. ძალიან ბევრი ჩვენი მომხრე უკვე მისულია და ხმა აქვს მიცემული. გამოვეხმაურები მდინარაძის ბრიფინგსაც, რომ თურმე მისი მონაცემებით ხელისუფლება დამაჯერებლად იგებს. სწორედ ეს არის ადმინისტრაციული რესურსი, როცა ადამიანები წინასწარ შედგენილი სიების მიხედვით, ბლანკების მიხედვით, რომელსაც საბავშვო ბაღების და სკოლების მასწავლებლებს ურიგებდნენ და სთხოვდნენ ოჯახის წევრების მონაცემებს, ამის მიხედვით მიჰყავთ უბნებზე, მაგრამ სულ ტყუილად ჰგონიათ, რომ მათი მიყვანილი ადამიანები ხმას აძლევენ "ქართული ოცნების" კანდიდატს, ძალიან ბევრი ადამიანისგან ჩვენ გვაქვს ინფორმაცია, რომ ისინი მიდიან მაგრამ ხმას არ აძლევენ "ქართული ოცნების" კანდიდატს", - განაცხადა ბაქრაძემ.
მისივე თქმით, მაღალია ალბათობა, რომ არჩევნების მეორე ტური გაიმართოს.
"ჩვენი ამოცანაა ვიბრძოლოთ გამარჯვებისთვის. ჯერჯერობით იმის გამო, რომ ბევრი ამომრჩეველი არ არის მისული უბანზე, მეორე ტურზე საუბარი ნაადრევია, თუმცა ალბათობა მაღალია, რომ იქნება მეორე ტური",- განაცხადა ბაქრაძემ.