საქართველოს პრეზიდენტ გიორგი მარგველაშვილსა და პარლამენტის ყოფილ თავმჯდომარეს, "შენების მოძრაობის" ლიდერს, დავით უსუფაშვილს შორის შეხვედრა უახლოეს დღეებში შედგება. ამის შესახებ საქართველოს პრეზიდენტმა გიორგი მარგველაშვილმა ჟურნალისტებს დასმული კითხვის საპასუხოდ განუცხადა.

როგორც მარგველაშვილმა აღნიშნა, შეხვედრა მხოლოდ საპრეზიდენტო კანდიდატის საკითხზე არ გაიმართება.

"მანამდეც დავაფიქსირე ჩემი პოზიცია, რომ ჩემს ყოფილ კოლეგასთან, ბატონ დავით უსუფაშვილთან მექნება შეხვედრა. უბრალოდ, იმ მომენტიდან ძალიან ინტენსიური იყო ჩვენი მუშაობის გრაფიკი. ამ დღეებში შევხვდები და გავისაუბრებ მასთან, არა საპრეზიდენტო კანდიდატის თემაზე, არამედ, მოსაზრებებზე, როგორ ემსახურონ ჩვენს სამშობლოს", - განაცხადა მარგველაშვილმა.

ცნობისთვის, დავით უსუფაშვილმა საქართველოს პრეზიდენტს რამდენიმე დღის წინ ღია წერილით მიმართა, სადაც აღნიშნულია, რომ პრეზიდენტმა და ოპოზიციამ ერთად განიხილოს საპრეზიდენტო კანდიდატთან დაკავშირებული წინადადებები. "მოგმართავ, განიხილო შენი მონაწილეობა ამ გეგმის დახვეწაშიც და შესრულებაშიც. თუ მზად ხარ, იყო ესოდენ საჭირო ახალი პოლიტიკური პროექტის თანაინიციატორი და შენი შემდგომი პოლიტიკური ნაბიჯები ამ ურთულესი საქმის ინტერესებს დაუქვემდებარო, ნატო-ს სამიტის შემდეგ მალევე ვისაუბროთ, მათ შორის, ამ საქმეში შენს დღევანდელ თუ ხვალინდელ როლზე",- ნათქვამია უსუფაშვილის ღია წერილში.