ერთიან ეროვნული გამოცდებზე, რომელიც 2 ივლისს იწყება კონდიციონერი მხოლოდ რუსთავის საგამოცდო ცენტრში იქნება ხელმისაწვდომი. შესაბამისად, მხოლოდ ის აბიტურიენტები, ვინც საგამოცდო ადგილად რუსთავი აირჩია დაწერენ გამოცდებს გრილ გარემოში.

ეროვნული გამოცდების ცენტრის ცნობით, რუსთავი საპილოტე პროგრამის ფარგლებში შეირჩა და სწორედ ამიტომ დამონტაჟდა იქ კონდიციონერი, ამას ხელი შეუწყო იმ გარემოებამაც, რომ შენობა ისეთ ადგილას მდებარეობს, რომ მუდმივად მზის ქვეშაა. შეკითხვაზე, რატომ ვერ მოხერხდა სხვა საგამოცდო ცენტრებშიც კონდიციონერის დაყენება, გამოცდების ეროვნული ცენტრმა ამ კითხვაზე პასუხის მისაღებად განათლების სამინისტროსთან გადაგვამისამართა. უწყებიდან პასუხის მიღებისთანავე ნეტგაზეთი მას შემოგთავაზებთ.

ეროვნული გამოცდები მუდმივად ივლისის თვეში ტარდება, როცა ტემპერატურა მაღალია. სიცხე და კონდიციონერის არარსებობა გასულ წლებშიც წარმოადგენდა პრობლემას აბიტურიენტებისათვის. ეროვნული გამოცდების ცენტრი გამოცდებს 800-ზე მეტ სექტორში ატარებს. ცენტრის ხელმძღვანელი მაია მიმინოშვილი შარშან "ნეტგაზეთთან" საუბრისას ამბობდა, რომ მთელი ქვეყნის მასშტაბით და ყველგან კონდიციონერის დამონტაჟება შეუძლებელია.

"კარგი იქნებოდა, ქვეყანას რომ ამის შესაძლებლობა ჰქონოდა. რამდენიმე სკოლაც რომ ყოფილიყო გაგრილების სისტემით, აქცენტს მათზე ავიღებდით, მაგრამ ჯერჯერობით ასე არ არის. იმედია, მომავალში იქნება. ბუნებრივია, ჩვენ არ გვაქვს არანაირი შესაძლებლობა და უფლება, რომ სკოლების ან უმაღლესი სასწავლებლების სექტორებში კონდიციონერები დავამონტაჟოთ. ეს სრულიად წარმოუდგენელია. მხოლოდ ფინანსურ მხარეზე არ არის საუბარი, რადგან როცა ერთ სექტორში 15 ადამიანი ერთადროულად ზის, იქაც არსებობს პრეტენზიები, რომ… მე, მაგალითად, არ მიყვარს კონდიციონერი. მირჩევნია ბოლომდე გავუძლო სიცხეს, ვიღაცაზე [პირიქით] მოქმედებს კონდიციონერი და მისი გამორთვა უნდა, ვიღაც ამბობს, რომ ძალიან ცხელა და ჩართეთ",- ამბობდა მიმინოშვილი.

გამოცდების ეროვნულ ცენტრში დღეს აცხადებენ, რომ საპილოტო პროექტის ფარგლებში მოხდება იმის გაანალიზება, როგორ აისახება კონდიციონერის არსებობა საგამოცდო პროცესის მიმდინარეობაზე.