აფგან მუხტარლის საქმის განხილვა აზერბაიჯანის სააპელაციო სასამართლომ დაიწყო. პირველი სხდომა აზერბაიჯანის ქალაქ შაქის სასამართლოში გაიმართა. ინფორმაციას ifact.ge ავრცელებს.

სხდომაზე მოსამართლემ, რაფაელ ალიევმა მუხტარლის ჩვენება მოისმინა, რადგან პროცესს არ ესწრებოდა დაზარალებული მესაზღვრე გაფურ მამადოვი. მოსამართლემ საქმის მოსმენა 14 მარტისთვის გადადო და განაცხადა, რომ სასამართლო შეტყობინებას მესაზღვრესაც გაუგზავნის.

მუხტარლიმ ჩვენებაში განაცხადა, რომ იგი არ ენდობა სააპელაციო სასამართლოს და მათ მიერ მიღებულ გადაწყვეტილებას, თუმცა თვლის, რომ ეს პროცესი აუცილებელია მოგვიანებით ევროპულ სასამართლოში საქმის გასასაჩივრებლად.

მუხტარლიმ ისიც აღნიშნა, რომ აზერბაიჯანული მხარე მას არ აძლევს უფლებას ჩვენება მისცეს ქართულ გამოძიებას. თავის ჩვენებაში მუხტარლიმ გატაცების დეტალებზეც ილაპარაკა და როგორც ადრე, ამ დანაშაულის ჩადენაში ქართველ მაღალჩინოსნებს ადანაშაულებს.

სხდომას მუხტარლის ქართველი და ადგილობრივი ახლობლები და აზერბაიჯანული ოპოზიციური პარტიის “მუსავათის” წარმომადგენლები ესწრებოდნენ.