ბათუმის ბოტანიკური ბაღში, კამელიის სახეობების და ჯიშების პოპულარიზაციისა და დაინტერესებული პირებისათვის მათი გაცნობის მიზნით, კამელიების გამოფენა-გაყიდვა გაიმართა.

ღონისძიებას აჭარის მთავრობის თავმჯდომარე ზურაბ პატარაძე მიწვეულ სტუმრებთან ერთად ესწრებოდა. გამოფენაზე იაპონური კამელიის 70-მდე ჯიში და 20-მდე ჰიბრიდული ფორმა იყო წარმოდგენილი.

„ბათუმის ბოტანიკურ ბაღში მორიგი არაჩვეულებრივი კამელიების გამოფენა მოეწყო. ეს არის დღესასწაული, ფესტივალი. დაგეგმილია სხვა ანალოგიური ღონისძიებები. ეს ყველაფერი ხელს უწყობს ჩვენი რეგიონის ცნობადობის ამაღლებას, უამრავი უცხოელი ტურისტი და ვიზიტორი ჩამოდის, რომელთაც აქვთ საშუალება მოინახულონ და დატკბნენ ბათუმის „სავიზიტო ბარათით“ - ბათუმის ბოტანიკური ბაღით. მინდა ყველას მოვუწოდო, რომ ხშირად იარონ ბოტანიკურ ბაღში. ასევე, მინდა მადლობა გადავუხადო ბაღის ადმინისტრაციას“, - აღნიშნა ზურაბ პატარაძემ.

აღნიშნული ღონისძიება, ხელს უწყობს საზოგადოებაში ბოტანიკური ბაღის ცნობიერების გაზრდას, კერძოდ კი, ბაღის კოლექციაში არსებული კამელიის ჯიშებისა და ფორმების გავრცელებას მოსახლეობასა და დასახლებული პუნქტების გამწვანებაში.